Ақтөбеде полиция қызметкерлері 19 мың доза есірткіні тәркіледі

Құқықтық тәртіп жедел алдын алу іс-шарасын өткізу кезінде Ақтөбе облысы ПД есірткі қылмысына қарсы іс-қимыл басқармасының қызметкерлері Гришин көшесіндегі аулалардың бірінде 44 жастағы ер адамды тоқтатты, деп хабарлайды Polisia.kz сайты. Одан есірткі заты бар 35 полиэтилен пакеттері табылды.

Сараптама көрсеткендей, тәркіленген зат - салмағы екі килограмнан асатын марихуана. Сондай-ақ, ұсталған адам опиоидтерді қолданудан туындаған мас күйінде болды. Есірткі затын бейтаныс адамнан сатып алғанын айтты.

Қызметтік иттің көмегімен күдіктінің пәтерін тінту кезінде полиция балконнан жеті килограмнан астам осыған ұқсас затты тапты. Аталған фактілер бойынша ҚР ҚК-ның 297-бабының 1-бөлігі "есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, сатып алу, сақтау, тасымалдау, жөнелту не өткізу" бойынша сотқа дейінгі тергеу басталды.

Қара нарықта тәркіленген есірткінің сомасы 3 млн теңгеден асады, тәркіленген есірткі заттары 19 мыңнан астам бір реттік дозаны құрады. Ер адамның мүлкі тәркіленіп, бес жылдан он жылға дейін бас бостандығынан айырылуы мүмкін.