Қазақстанда полицейлер автобус жолаушысынан жүздеген доза героин тапты

Жедел қызмет қызметкерлеріне  белгісіз адамдардың есірткіні заңсыз сақтау және тасымалдаумен айналысатыны туралы ақпарат келіп түскен . Түркістан облысының есірткі қылмысымен күресушілер жедел-іздестіру қызметін бастады, деп хабарлайды Polisia.kz сайты.

Тәртіп сақшылары Шымкент-Самара тас жолының бойында жүріп жатқан автобус көліктерін біртіндеп тексере бастайды. Тексеру кезінде Алматы-Түркістан бағытында келе жатқан автобустағы жолаушы әйел күдік тудырады. Осылайша жедел шаралардың нәтижесінде әйелдің сөмкесінен қағазға оралып, полиэтилен пакетіне салынған ақ-сұр түсті есірткіге ұқсас ұнтақ табылды.

- Тәркіленген айғақты затты сараптамаға жолдады. Оның қорытындысы бойынша есірткіге ұқсас заттың жалпы салмағы 60 грамға жуық “героин” екені анықталды. Яғни, героиннің бұл салмағы 300-ге жуық адамның бір реттік дозасы екені белгілі болды, - деп хабарлайды ҚР ІІМ.

Болған жайт ҚР ҚК-нің 297-бабы (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) бойынша сотқа дейінгі тергеп-тексерудің бірыңғай тізіліміне тіркелді.

Қазіргі уақытта күдікті әйел бірден қамауға алынып, оған қатысты сотқа дейінгі тергеу амалдары жүргізілуде.