Шығыс Қазақстан полицейлері 6 бірдей есірткі тасымалының жолын кесті

Шығыс Қазақстан облысы Полиция департаментінің мәлімдеуінше, жалпы аймақ бойынша 281 келі түрлі есірткі заттары тәркіленген. Оның 263 келісі - меңдуана шөбі. Барлығы 6 тасымал жолы жабылды. Олардың біреуі – Нұр-Сұлтан қаласынан, біреуі – Жамбыл облысынан, төртеуі – Алматы қаласынан.

- 5 қылмыстық топ анықталды. Олардың біреуінде 5 адам бар. 3,5 келі синтетика табылды. Ұсталғандардың үстінен сотқа дейінгі тергеу ісі қозғалды, - деп хабарлады ШҚО Полиция департаментінің басшысы Сағат Мәдиев онлайн есеп беру жиналысында.

Қалған 3 топтан 75 келі меңдуана мен 10 келі гашиш (құрғатып, кептірілген смола тәрізді зат), енді біреуінен 169 грамм психотроптық зат тәркіленген.