Оқиғалар Өскеменде қылмыстық топ құрықталды
Әккі ұрылар тобы облыс орталығының аумағын екі жыл бойы торуылдап, жымысқы әрекеттерін іске асырып келген
Жақында тәртіп сақшылары Өскеменде 10 пәтерді бірлесіп тонаған бес ер адамды құрықтады.
Ұрылар тобы алдымен үй иелерін және олардың жұмыс кестелерін бақылап, жезбезекті кілттің көмегімен пәтердің ішіне кірген. Біреуі үйдің ішін тонап жатқанда, екіншісі көшеде "қауіпсіздікті" бақылаумен болған. Қылмыскерлер тек құнды зергерлік бұйымдар мен ақшаны ұрлаған.
- Жалпы сегіз миллион теңгеден аса шығын келтірілген, - деп ШҚО ІІД баспасөз қызметі хабарлады.
Ер адамдарға қатысты ҚР ҚК 188-бабы бойынша қылмыстық іс қозғалды. Тергеу барысында анықталғандай, қылмыстық топтың мүшелері бұрын бірнеше рет мүліктік қылмыс үшін сотты болған. Енді олар 5 жылдан 10 жылға дейінгі мерзімде бас бостандығынан айырылуы мүмкін. Қазіргі таңда олардың басқа да қылмыстарға қатыстылығы тексерілуде.