Ресейлік балуан Абдулрашид Садулаевты Парижде тонап кетті

Бұл туралы Ресей құрамасының еркін күрестен жаттықтырушысы Дзамболат Тедеев ТАСС агенттігіне хабарлады.

Ресей командасы қонақтап отырған қонақ үйден спортшының құжаттары мен ақшасы салынған сөмкені ұрлап кеткен.

- Абдулрашидтың жеке куәлігін де ұрлап кеткен. Таңғы асты ішіп, әуежайға аттанар кезде араб келбетті ұрлықшы бөлмеге кіріп кеткен. Мен қазір спортшымен қалдым. Қазір консулдыққа барамыз. Қанша уақытқа қалатынымыз белгісіз, шығынның өтелетініне үміт артпаймыз, - дейді Тедеев.

Сенбі күні Садулаев әлем чемпионатының алтын медалі үшін күресте американдық Кайл Снайдерден жеңіліп қалды.