Көңілді отырыс қайғылы аяқталды

Төрт таныс көңілді отырыстың шырқын полиция қызметкерлері мен жедел жәрдем бұзатынын ойламаған. Алайда, ішімдікке сылқия тойған ер адам құрбысын балағаттап, аяғы ұрысқа ұласып кетеді. Дегенмен, өз қатесін мойындаған азамат құрбысынан кешірім сұрап, құшақтамақ болғанда бойжеткен пысақ сұғып алған. Ашуға булыққан ару есін жиып, жедел жәрдемді өзі шақыртқан. Дер кезінде ауруханаға жеткен ер адам аман қалғанымен, құрбысына заң алдында жауап беруге тура келді. - Айыпталушыны ҚР ҚК 106-бап 1-бөлімі бойынша айыпты деп танып, 5 жылға бас бостандығынан айыру, - деп көрсетілген №2 Өскемен қалалық сотының шешімінде. Айта кетейік, осы оқиғада зардап шеккен азамат соттан бойжеткенді бас бостандығынан айырмауды өтінген. Алайда, бас бостандығынан айырылумен қатар бойжеткен зардап шегушінің еміне жұмсалған 202 мың теңгені де төлеуі керек. Сот шешімі әлі заңды күшіне енген жоқ.