Оңалту орталығының басшылары істі болды

Глубокое ауданында «Шаг к жизни» оңалту орталығының ұйымдастырушылары мен қызметкерлері болып табылатын 4 азаматқа қатысты қылмыстық іс қаралды. Олар заңсыз өз пациенттерінің бас бостандығын шектеген деп айыпталуда. Естеріңізге сала кетейік, жаз маусымының басында Глубокое ауданындағы полиция бөлімшесіне Черемшанкадағы «Шаг к жизни» оңалту орталығының бірден үш азаматы арызданған болатын. Олар орталық басшылары өздерін жұмыс істетіп, тәртіпті бұзған жағдайда жазалап, тіпті, бас бостандығын шектегенін айтқан болатын. Тәртіп сақшылары орталықтың екі басшысы мен екі қызметкерін тұтқындаған. Алайда, айыпталушылар өздерінің барлық әрекеттері заңды және әділ болғанын алға тартқан. Айта кетсек, бүгінгі таңда облыста 3,5 мыңнан астап ішімдікке және есірткіге тәуелді азамат тіркелсе, емдеу орталықтарында небары 180 орын бар.