Оқиғалар СҚО-да соғыс ардагерін 16 мың теңге мен теледидар үшін өлтірген
Солтүстік Қазақстан облысындағы Полтавка ауылының 89 жасар соғыс ардагерін 16 мың теңге мен теледидар үшін өлтіріп кеткен
Кісі өлтіру және қарақшылық шабуыл жасау фактісі бойынша Ішкі істер органдарының қызметкерлерімен сотқа дейінгі тергеу жұмыстары жүргізілуде, - деп хабарлайды Nur.kz.
Сол күні қылмыс жасаған деген күдікпен 21-жастағы екі тұрғын ұсталды.
24-ші наурызға қараған түні жалғыз тұрып жатқан зейнеткердің үйіне екі мас жігіт баса көктеп кіріп келген. Соғыс ардагерін ұрып-соғып теледидар мен 16 мың теңгені иемденіп, таксиге мініп алып облыс орталығына кетіп қалған.
Алған жарақаттарынан зейнеткер бірден көз жұмады. Қазіргі уақытта күдіктілер ұсталынып, тергеу изоляторында қамалуда.
М.Жұмабаев атындағы аудандық полиция бастығының орынбасары Азамат Ташевтің айтуы бойынша, болған жағдайға қажетті тергеу іс-шаралары мен сараптамалар тағайындалды.
Алдын ала тергеу жұмыстары бойынша айыпталушы ҚР Қылмыстық кодексінің 99 бабы 2 бөлімінің «Адам өлтіру» қылмысына сәйкес 15-20 жылға немесе өмір бойы бас бостандығынан айырылу жазасына кесілуі мүмкін.
