Оқиғалар Өскеменде жол-көлік оқиғасында жүкті әйел көз жұмды
Өскемендегі Абай және Михаэлис көшелерінің қиылысында аса ауыр жол-көлік оқиғасы орын алды
Фото:
Устинка Live
14-ақпан күні кешке қалалық автовокзал маңында екі автокөлік соқтығысып қалды. Бір жолаушы қаза болып, қалғандары түрлі дене жарақаттарын алды, деп хабарлайды ustinka.kz тілшісі.
Кешкі сағат сегіздер шамасында Абай даңғылының бойымен автовокзал жақтан келе жатқан Lada Priora автокөлігі Михаэлиса көшесіне бұрылмақ болған. Алайда қарсы жолда келе жатқан ішінде екі жолаушысы бар Toyota RAV-4 көлігімен соқтығысқан. Нәтижесінде Toyota автокөлігі жол жиегіне ұшып, жарнама конструкциясына соғылған. Онда отырған әйел ауыр жарақат алып, оқиға орнында көз жұмды. Анықталмаған мәліметтер бойынша, марқұм жүкті болған көрінеді.
- Toyota көлігіндегі жолаушылар арнайы құтқару тобының көмегімен шығарылды, - дейді ШҚО ІІД баспасөз қызметінің басшысы Бақытжан Торғаев. – Жол-көлік оқиғасына қатысты ҚР ҚК 345-бабы бойынша қылмыстық іс қозғалды. Қазіргі таңда сотқа дейінгі тексеру жұмыстары жүргізілуде. Мамандар жол-көлік оқиғасының жайттарын анықтауда.
