Өскеменнен 10 шақырым жерде болған ЖКО-дан 20 адам зардап шекті

Апат жексенбі күні сағат 10-дар шамасында Ұлан ауданындағы Мамайбатыр ауылына жақын маңда орын алған. Абырой болғанда, қаза тапқандар жоқ. Ал зардап шеккен азаматтарға алғашқы медициналық көмек көрсетілді.

- "Тойота Чейсер" жеңіл көлігі алдындағы көлікті басып озамын деп, қарсы жолаққа шығып кеткен, - деп хабарлайды ШҚО ІІД баспасөз қызметі. - Осылайша қарсы жолда келе жатқан "Тойота Превиа" көлігіне соғылған. Апат нәтижесінде он адам түрлі жарақат алған.

Айта кетейік зардап шеккендер арасындағы үшеуі – балалар. Көліктер қатты соққы нәтижесінде майысып, бір адам көліктің ішінде қалып кеткен. Гидравликалық құралдың көмегімен ол көліктен шығарылды.

ЖКО-ға байланысты ҚР ҚК 345-бабы бойынша қылмыстық іс қозғалды.