Нұр-Сұлтанда "Қазақмыс" корпорациясының көк тіреген ғимараты өртенді

Өрт туралы хабарлама ТЖД-ға сейсенбі күні сағат 18.30 шамасында келіп түсті. Өрт сөндіру бөлімшелері жоғары шақыру нөмірі бойынша оқиға орнына шықты. 

- Сағат 18.33-те Тұран даңғылы 37/10 мекенжайы бойынша орналасқан ТЖД өрт сөндіру бөлімшелерінен жоғары шақыру нөмірі бойынша шақырту түсіп, жеке құрамы 44 адам және 11 бірлік техникадан тұратын топ шықты. Алдын ала ақпарат бойынша, "Қазақмыс" ғимаратының шатыры мен сыртқы қаптамасының жануы орын алуда, - делінген сейсенбі күні таратылған баспасөз қызметінің хабарламасында.

Ведомствода өрт сөндірушілер шақыру орнына 5 минуттан кейін келгенін атап өтті. 

- Елордалық өрт сөндірушілердің күшімен өрт сағат 19.10-да ауыздықталды, өрттің шарпыған ауданы 60 шаршы метр, - делінген хабарламада. 

ТЖД өрт салдарынан қаза болғандар мен зардап шеккендер жоқ екеніне назар аударды.