ШҚО-да арнайы мектептен қашып кеткен тәрбиеленушілер тұрғынның көлігін айдап әкетті

Оқиға Шығыс Қазақстан облысының Көкпекті ауданында болды, деп хабарлайды Устинка LIVE тілшісі. Кәмелетке толмаған екі бала ерекше режимдегі арнайы мектептен қашып, қылмыс жасады.

- 30 маусымында сағат 04.30 шамасында кезекші түнгі тексеру кезінде Түркістан және Қызылорда облыстарының тумалары, кәмелетке толмаған жасөспірімдердің жоқ екенін анықтады. Арнайы мектептің сыртқы бақылау бейнекамерасы олардың қашу сәтін түсірген екен. Онда екеуі екінші қабаттан төсек жаймасын пайдаланып, төмен түсіп, үш метрлік металл дуалға өрмелеп шығып, мекеме аумағынан қашып кеткені тіркелген, - деп хабарлайды ШҚО ПД.

Кәмелетке толмағандарды іздеуге облыс полициясының жеке құрамы бағдарланып, бекеттер қойылды. Полиция қызметкерлері қызметтік-іздестіру иттерін қолдана отырып, арнайы мектеп қызметкерлері мен волонтерлердің көмегімен іздестіру іс-шараларын, оның ішінде орманды аралау іс-шараларын жүргізді.

- Қашып кеткендер, бірінші кезекте ақшалай пайда табу мақсатында, ауданның 54 жастағы тұрғынына тиесілі "УАЗ" маркалы автокөлікті айдап әкеткендері анықталды. Автокөлікті ұрлап, жақын маңдағы елді мекенге барып, осы көлікті 70 мың теңгеге сатқан. Содан кейін таксимен Өскемен қаласына жетіп, бірбағыттағы көлікті тоқтатып, Алматы қаласына қарай бет алған. "Өскемен-Алматы" автожолында шамамен 140-150 километр жүріп өткен соң қашып кеткен жасөспірімдерді полиция қызметкерлері ұстады, - дейді ШҚО ПД.

Қазіргі уақытта арнайы мектепке ҚР ҚІЖК-нің 200-бабының тәртібіне сәйкес, қайтарылған жасөспірімдерді бақылауды күшейту бөлігінде ұсыным жіберілді. Аталған факті бойынша ҚР ҚК-нің 200-бабы 1-бөлігіне сәйкес "Автомобильдi немесе өзге де көлiк құралын жымқыру мақсатынсыз құқыққа сыйымсыз иеленіп алу" сотқа дейінгі тергеу әрекеттері басталды.