Алматыдағы ХҚКО-да ер адам көз жұмды

Бұл туралы «Азаматтарға арналған үкімет» мемлекеттік корпорациясы» ресми мәлімдеме жасады.

«16 қаңтар күні Алматы қ. Алатау аудандық ХҚКО-да 1964 жылы туған Кунтаков Жарас Нуркибаевич есімді азаматтың қайтыс болғанын күйзеліспен хабарлаймыз.

Жарас Нуркибаевич ХҚКО-ға сағат 09:30-да «Тұрғылықты жері бойынша тіркелу» қызметіне жүгінген. Бұл уақытта ХҚКО-да адам көп болған жоқ. Жұбайы бланк толтырып жатқанда электрондық кезекке талон алып үлгермей-ақ сағат 09:42-де өзін жайсыз сезінген. Бұдан кейін оған ХҚКО-дағы кезекші медқызметкер шұғыл арада медициналық көмек көрсеткен. Сағат 09:52-де жедел жәрдем көлігі келіп жетті. Алайда ер адамды құтқару мүмкін болмады», деп «Азаматтарға арналған үкімет» мемлекеттік корпорациясы» Жарас Нуркибаевичтің туған-туыстары мен жақындарына көңіл айтты.

«Азаматтарға арналған үкімет» мемлекеттік корпорациясы» созылмалы аурулармен сырқаттанған тұлғаларға қарбалас сәтте қызмет көрсету орталықтарына бармаған дұрыс» деп кеңес береді. Айта кеткен жөн, ХҚКО-ларда мүмкіндігі шектеулі жандар мен жүкті әйелдер үшін жеңілдік терезелері жұмыс істрейді. Ал I және II топтағы мүгедектер ХҚКО қызметкерлерін 1414 нөмірі арқылы үйлеріне шақыруларына болады.