2020 жылы ШҚО мектептерінде Абайтану курсы пайда болады

Абай Құнанбаевтың 175 жылдығына орай өңірімізде «Абайтану» аймақтық бағдарламасы жүзеге асырылады. Бұл туралы Шығыс Қазақстан облысы әкімінің орынбасары Әсем Нүсіпова облыстық әкімдікте өткен аппараттық кеңес барысында хабарлады.

- Облыстың 277 мектебінде және екі педагогикалық колледжде мамандандырылған «Абайтану» кабинеттерін жабдықтау жоспарланған, ол бейнефильмдермен, дидактикалық материалдармен және Абай кітаптарының жиынтығымен жабдықталады, - дейді ШҚО әкімінің орынбасары Әсем Нүсіпова.

Бұл курсты оқытуға арналған авторлық бағдарламалар мен оқу-әдістемелік кешендер көрнекті абайтанушы ғалымдарының қатысуымен 2020 жылдың көктеміне дейін жазылады деп жоспарлануда. Сонымен бірге, жаңа курсты оқытуға 280 қазақ тілі мен әдебиеті мұғалімі дайындалады.

2020 жылдың 1 қыркүйегінен бастап элективті курс 5-8 сыныптарда оқытылады. Ұлы Абай мұрасын зерттеу біздің өңірдегі 76 150 баланы қамтымақ. Сонымен қатар, 1-4 курс студенттері (бұл шамамен 6000 адам) 2020 жылдың қаңтар айынан бастап жоғары оқу орындарында «Абай және ХХІ ғасыр» элективті курсын оқи бастайды.