"Kazzinc Holdings" директорлар кеңесінің төрағасы Никола Поповичке "Парасат" ордені табысталды

Елбасы берген орденді облыс әкімі Даниал Ахметовтың өзі табыстады.

- Ерен еңбектеріңіз үшін үлкен алғысымды білдіремін. Облысымыз сіздердей азаматтармен мақтана алады. Мерекелеріңізбен шын жүректен құттықтаймын, - дейді өңір басшысы.

Ал Никола Попович болса, өз кезегінде, өңірдің әлеуметтік-экономикалық дамуына үлес қосуына облыс әкімдігімен бірге жасалған тиімді, тығыз қарым-қатынас әсер еткенін айтады.

- Бұл марапаттаулармен елбасымыз әкімдік пен әлеуметтік ынтымақтастықтың маңызын атап өтті, - дейді «KazzincHoldings» директорлар кеңесінің төрағасы Никола Попович. - Шығыс Қазақстанның ең ірі компаниясы ретінде өңірдің дамуына үлес қосуымыз керек деп есептеймін. Бұл бағыттағы стратегияны үйлестіріп отырған облыс әкімі әлеуметтік сұраныстардың қыр-сырын жетік біледі. Мемлекет басшысының да біздің елеулі үлесімізді байқап отырғаны қуантады. Біз бұл бастамаларды әрқашан қолдауға дайынбыз.

Парасат ордені - Қазақстан Республикасының ордені. Қазақстан Республикасының Президентінің Жарлығымен 1993 жылы белгіленді. “Парасат” орденімен ғылым мен мәдениет, әдебиет пен өнер қайраткерлері, сондай-ақ республиканың рухани және интелектуалдық әлуетін дамыту мен молайтуға зор үлес қосқан немесе адам құқықтарын және оның әлеуметтік мүдделерін қорғау жөніндегі белсенді қызметі үшін азаматтарды марапаттайды.