ШҚО-да 70 су қоймасы қоқыстан тазартылды

Челлендж қатысушылары 70 су нысанын қоқыстан тазартты, деп хабарлайды Устинка LIVE тілшісі. Атап айтқанда, олар - Үлбі, Ертіс, Шаған, Қарашоқы, Аягөз өзендерінің жағалауы, Алайғыр көзі, Балықтыкөл, Шалқар көлдері және басқалар. Шығысқазақстандықтар 740 тонна немесе 2960 текше метр қалдық жинады.

Қатысушылар саны бойынша Семей қаласы көшбасшы болды. Мұнда 13 мың адам тазалыққа шықты. Екінші орында - Өскемен. Оған 7350 қала тұрғыны қатысты. Алтай ауданында 2312 аталған акцияға қатысты.

- Онколог-дәрігерлер ретінде біз қоршаған ортаның тазалығы адамдардың денсаулығына тікелей әсер ететінін жақсы түсінеміз. Сондықтан да біз эстафетаны қуана қабылдап, әр апта сайын қатысуды жалғастырамыз, - дейді Шығыс Қазақстан облыстық көп салалы онкология және хирургия орталығы директорының медициналық бөлім жөніндегі орынбасары Арман Мұқажанов. - Бұл Қазақстанды таза етіп қана қоймай, адамдардың мәдениетін арттыруға көмектеседі және әркім табиғатқа қамқорлық жасай бастайды деп есептеймін.

Естеріңізге сала кетейік, #Birge #TazaQazaqstan акциясы 27 шілдеде басталған болатын. Тек бір күнде 800 тоннадан астам қоқыс жиналды. Экологиялық челлендж қыркүйектің соңына дейін апта сайын өтеді.