Ауыл әкімі парамен ұсталды

Жер учаскесін сатпақ болған әкім қолға түсті. Прибрежный — облыстағы көрікті өлкелердің бірі әрі Бұқтырма су қоймасына жақын орналасқан. Басқа елді мекендермен салыстырғанда, бұл жерде демалыс базалары жоқ, құрылыс жұмыстары да белсенді жүргізіліп жатқан жоқ. Осындай жайлы жерде үй салу – арман. Сондықтан да Зырянның тұрғындарының бірі осындай асқақ армандарының бірін жүзеге асыруға ниеттенеді. Тұрғын жер қатынастары бөліміне жер бөлу туралы өтініш білдіргенімен, бөлім өтінішті қанағаттандырмаған. Артынша ауыл әкімі азаматқа өз көмегін ұсынған, бірақ тегін емес. Елді мекен әкімі өз қызметіне 400 мың теңге сұраған. Азамат ол сомамен келісіп, 100 мың теңге көлемінде алдын ала төлем жасаған. Бірақ артынша жемқорлықпен күрес қызметіне хабарласқан. Жемқорлықпен күрес қызметінің мамандары әкімді қалған соманы алып жатқан сәтінде қолға түсірген. Қазіргі таңда сотқа дейінгі тергеу амалдары жүріп жатыр.