ШҚО жолдары мен көшелерін жөндеу үшін бақандай 15 миллиард теңге бөлінген

Бөлінген ақшаның 1 миллиар теңгесі Бұқтырма су қоймасы арқылы өтетін көпірдің құрылысына қарастырылып, қосымша тағы бес миллиард теңге бөлуге өтініш жіберілді, деп хабарлайды Устинка LIVE тілшісі.

- 50/50 қаржыландыру шеңберінде облыстық және аудандық маңызы бар жолдарды орташа жөндеуге 3,3 миллиард теңге бөлінсе, тағы 1,5 миллиард теңге бөлуге өтініш берілді. Біз жөндейміз деп жоспарлап отырған 137 шақырымдық жалпыға ортақ пайдаланылатын автомобиль жолдарының 86 шақырымы - облыстық, 51 шақырымы - аудандық маңызы бар автомобиль жолдары, - дейді ШҚО жолаушылар көлігі және автомобиль жолдары басқармасының басшысы Нұржан Жұмаділов.

Үлкен Нарын – Күршім тас жолының 11 шақырымы, Мақаншы – Жалаңашкөл тас жолының 20 шақырымы, Аягөз - Қарауыл - Семей – Қайнар тас жолдарының 11 шақырымы, Омбы - Майқапшағай - Шілікті – Ақжар та жолдарының 20 шақырымы, Күршім – Қалжыр жолының 15 шақырымы, Таврия- Каменка – Тройницкое жолдарының 10 шақырымы, Согорное - Барлық – Ақсу 14 шақырымы, Күршім - Ақсуат – Жолнұсқау тас жолының 27 шақырымы, Семей – Курчатов тас жолының 9 шақырымы жһндеп, ретке келтірілмек.

Шығыс Қазақстан облысының қалалары мен аудандарындағы көшелер мен жолдарды жөндеуге 7,4 миллиард теңге бөлінді, барлығы 171 шақырым жөнделеді деп жоспарлануда.

- Өскеменде көлік жүрнетін жолдың 18,7 шақырымына орташа жөндеу жұмыстары жүргізіліп, 7,2 шақырымы қайта жаңартылады. Қарағайлы Семей ықшам ауданында 3,5 шақырымдық кварталішілік көшелер ретке келтіріледі, 7 шақырым жер орташа жөндеумен қамтылады. 34 елді мекенде "Ауыл ел бесігі" бағдарламасы аясында 165 шақырым көшелер жөнделеді, - деп түсіндірді Нұржан Сайлаубекұлы.