ШҚО Ана мен бала орталығының пациенттері дауыс беруге қатысты

Ана мен бала орталығы пациенттерінің арасында ана атанғандар да, сол күнді күтіп жүргендер де бар.

– Біз дауыс беруге қатысып, өз таңдауымызды жасадық. Қызым осында емделіп жатыр, мен оның қасындамын, бірақ соған қарамастан біздерге өз құқығымызды пайдаланып, балаларымның болашағы үшін дауыс беруге мүмкіндік туғызып отыр, – дейді Жәзира Еңсебаева.

Медициналық мекеменің бас дәрігері Ермек Омарбеков атап өткендей, сайлау құқығы барлығына толық берілді, жабық учаскеде комиссия жұмыс істеуде. Пациенттердің ешқайсысы өз дауысын беруден бас тартқан емес. Олардың кейбіреуі үшін бұл алғашқы сайлау екен.

– Менің ойымша, мұның тіпті біршама символикалық мәні де бар, – деп атап өтті Ермек Сембайұлы. – Біздің орталықтағы емделушілер өз балаларының болашағын таңдайтындарын түсінеді. Дауыс беру барлық бекітілген нормаларға сәйкес өткізілуде. Бүгін еліміз үшін өте маңызды тарихи күн. Бұл сайлауда біз өз дауысымызды ел Парламентінде халықтың мүддесін қорғайтын адамдарға береміз. "Біз біргеміз!" деген сөзді баршаның түсініп, әрбір дауыстың маңыздылығын ұғынатындары қуантады.

Ермек Омарбеков, сондай-ақ, медициналық мекеменің қызметкерлері бүгін ауысымға шығар алдында дауыс беруге қатысқандарын айтты. Естеріңізге сала кетейік, Ана мен бала орталығы – Шығыс Қазақстан облысының барлық тұрғындарына сайлау құқығын қамтамасыз етуге мүмкіндік берген 71 жабық учаскенің бірі.