Қаланың коммуналдық қызметтер бөлімі: "Өскемен таза болады"

Коммуналдық кәсіпорынның жетекшісі былтыр қыстағыдай жағдай биыл болмайтынын айтты, деп хабарлайды Устинка LIVE тілшісі.

2019 жылдың аяғы мен 2020 жылдың басында төпелеп жауған қалың қармен, тоң болып қатқан мұз, артынша еріп қалыптасқан көктайғақпен бір ғана "Жаңа Согра" мердігер компания алысқан болатын. Биыл "Таза Өскемен" болып атауы ауысқан ЖШС басшысы Тимур Екібасов:

- Өзімізде біраз қиындықтар болуы себепті былтыр дер кезінде қар тазалап, мұз ойып үлгермедік. Биыл енді ондай қателіктер қайталанбайды, - деп мойындады.

Өскемен жолдарын қыс мезгіліне дайындау қызметі бойынша мемлекеттік сатып алу бойынша тендер ойнатылып қойды. "Ремдор", "Спецкоммунтранс", "Катонқарағай ПДУ", "ДСУ-11", "Кадэ" атты 5 жол бірлестіктері анықталды. Әзірге жұмысшылар қала құрылыстарында, жөл жөндеу жұмыстарында жүр.

- Егер қар 1-қарашаға дейін түсіп қоятын болса, техникалар оған да 100% дайын. Тәулік бойы көше тазалайтын кезекші топтар ұйымдастырылып жатыр, - дейді "Таза Өскемен" ЖШС басшысы.