Өскемен мен ШҚО Электронды билет қашан іске қосылады?
Облыстық мәслихат сессиясында Жолаушылар көлігі басқармасының басшысы келер жылы облыс орталығының тұрғындары мен қала қонақтарын қандай өзгерістер күтіп тұрғанын айтты
2020 жылдан бастап облыс орталығындағы қоғамдық көліктерде кондукторлар болмайды, оның орнын электронды жүйе басып, жолақысы қолма-қол ақшасыз төленетін болады.
- Электронды билеттердің жаңа жүйесі барлық қоғамдық көлік бағыттарын, оның ішінде төрт трамвай бағытын да қамтиды. Сонымен қатар, қала қонақтары мен тұрғындары трамвайлар мен автобустардың қозғалысын нақты уақыт режімінде, яғни, арнайы мобильдік қосымша арқылы бағыттарды қадағалай алады. Бұл автобустардың келу уақытын есептеп, уақыт үнемдеуге мүмкіндік береді. Жоба 2020 жылдың екінші жартысында, нақтырақ айтқанда, мамырдан бастап жүзеге асырыла бастайды, - деді облыстық Жолаушылар көлігі және автомобиль жолдары басқармасының басшысы Нұржан Жұмаділов.
Облыс әкімінің айтуынша, билеттердің электронды болуы қызмет сапасын арттырып, тасымалдаушылардың кірісін нақты анықтауға мүмкіндік береді.
Бұл тұста айта кетейік, электронды билетпен есеп айырысатындар үшін жолақысы сол күйі қала бермек. Яғни, қала ішінде қатынау әдеттегідей 90 теңге болады. Жеңілдікпен қатынайтындарға арнайы карта беріледі. Ал қалған тұрғындар валидаторға арналған электронды картамен немесе байланыссыз төлем жасау функциясы бар кез келген банктік картамен есеп айырылыса алады.
