Өскемен мен ШҚО Үй шатыры жанып кеткен
Үйге жақын салынған шаруашылық нысанынан шыққан өрт, ауланы бойлай екі иеге арналған үйдің кіре берісі мен төбесін жайлаған
Өрт бүгін солжағалау ауданындағы Республиканская көшесіндегі жер үйлердің бірінде шыққан. Жел екпінімен өрт күшейе түскен.
- №3 өрт сөндіру бөлімінің мамандары алғашқы болып жеткен. Көмекке қосымша көршілес қалалық өрт сөндіру бөлімдерінің қызметкерлері жіберілген. Мамандар үй ішінен екі толы газ баллондарын алып шықты, - дейді ШҚО ТЖД "Өртке қарсы қызмет" ММ басшысының орынбасары Болат Нұрдыбаев.
Тілсіз жауды ауыздықтауға жақын маңда гидранттардың болмауы кедергі келтірген. Өрт сөндіру көліктері кезек-кезек Ертістен су толтырып тасып отыруға мәжбүр болған.
Өртті сөндіру үшін бір сағат уақыт кеткен. Жалпы өрт шарпыған аумақ 200 шаршы метр.
Үйді аман алып қалғанымен, шатыр мен шаруашылық нысандары айтарлықтай өртеніп кеткен. Қазіргі уақытта өрттің шығу себептері анықталу үстінде.
