Өскемен мен ШҚО Көкпекті ауданының 34 көпбалалы отбасы баспаналы болды
Ал баспана кілттерін табыстау шарасы кеше аудан орталығындағы Қалиқан Алтынбаев атындағы мәдениет үйінде болды
Көпбалалы көкпектіліктерге сатып алынған үйлерге демеушілердің қаражатына жөндеу жұмыстары жүргізілген.
Кей үйлердегі жөндеу жұмыстары әлі аяқталмаған. Бірақ қуаныштары қойнына сыймаған отбасылар жаңа үйге қоныстанып үлгерген.
- Мен облыс және аудан басшылыған ризашылығымды білдіремін, - дейді бес құрсақ көтерген көкпектілік Кира Вишнякова. - Мұндай зәулім үй туралы тек армандаушы едік. Мемлекет өз халқын қолдағаны маңызды. Мен бақыттымын!
Аудан әкімі Асхат Смаилов өзі бірнеше отбасының үйіне барып, жаңа қоныспен құттықтап қайтқан.
- Көпбалалы отбасыларды қолдаудың үш деңгейлі әлеуметтік бағдарламасының арқасында осы уақытқа дейін тұрғын үй кезегінде тұрғандарды бюджеттен тыс қаржы көздері есебінен баспанамен қамтамасыз етуге мүмкіндік туды, - деп атап өтті аудан әкімі.
Ауданның ішкі саясат бөлімі ұсынған ақпаратқа сүйенсек, 34 отбасыға баспана кілті табысталған. Жалпы өңір бойынша оған 54 млн теңге жұмсалған.
