Анасы мен баланы қағып кеткен жүргізуші тергеуде

Сол күні 14 сәуірде жүргізілген медициналық куәландырудың мәліметтері бойынша, ЖКО кезінде жүргізуші мас болған, деп хабарлайды Устинка LIVE тілшісі.

- Осы факті бойынша ҚР ҚК 345-бабы 3-бөлігі "Абайсызда адам өліміне әкеп соққан жол қозғалысы ережелерін бұзу" бойынша сотқа дейінгі тергеу басталды, - деді Өскемен қаласы ПБ баспасөз хатшысы Әсел Әміренова. - 21 жасар жүргізуші уақытша ұстау абақтысына қамалды.

Естеріңізге сала кетсек, 14 сәуір күні Өскемен қаласындағы Гагарин бульварында жаяу жүргіншілердің қатысуымен жол-көлік оқиғасы орын алған. Үлкен жылдамдықпен келе жатқан иномарка көлігін тізгіндеген жас жігіт сол сәтте жолдан өтіп бара жатқан әйел мен баланы қағып кеткен. Зардап шеккендер жедел жәрдем көлігімен қала ауруханасына жеткізілді. Бала бірнеше операциядан кейін алған жарақаты салдарынан Ана мен бала орталығында көз жұмды, ал анасы әлі күнге дейін облыстық мамандандырылған медициналық орталықта жатыр.