Өскемен мен ШҚО Тұрақтағы көлік өртеніп кетті
Бүгін таңертең Семей қаласында шетелдік көліктің моторлы бөлігінен өрт шыққан
Семейліктер әлеуметтік желіге жариялаған бейнежазбада базарға жақын Засядько көшесінде тұрған Toyota ED көлігінің жанып жатқаны бейнеленген.
ШҚО ТЖД баспасөз қызметі хабарлағандай, өрт көлік жүргізушісі уақытша тұраққа көлігін қойып, жақын маңдағы асханаға кеткен уақытта шыққан.
- Өрт сөндіру қызметі бірнеше минутта оқиға орнына жеткен, - дейді мекеменің баспасөз хатшысы. - Көліктің моторлы бөлігі жанып жатқан.
Құтқарушылар жеткен уақытта көліктегі от лапылдап, капотты ашу қиынға соққан. Көлік маңында ешкім болмағандықтан ешкім зардап шеккен жоқ.
- Жалынды ауыздықтау үшін көбік шаштық. Ыстық температурадан салондағы аспаптар панелі зақымданған, - дейді №2 шұғыл кезекші тобының көмекшісі Айдын Тілеужанов.
