Өскемен мен ШҚО ШҚО зейнеткері еңбек өтілін сот арқылы дәлелдеді
Катонқарағайлық қария үш жылдық еңбек өтілінің есептелмей қалғанын айтып, сотқа жүгінген
Биыл Қазақстанда зейнетақы реформасы жүзеге асырыла бастады, енді базалық зейнетақы жұмыс өтілімен есептеліп берілетін болды. Жұмыс өтілі көп болса, соғұрлым зейнетақы да көп болмақ. Алайда кейбір зейнеткерлердің еңбек өтілі дұрыс есептелмей қалған екен.
Мәселен, Катонқарағай ауданының тұрғыны 1994-1996 жылдары жүргізуші болып жұмыс істегенімен, оның үш жылдың еңбек өтілі есептелмей қалған.
- Мен Үлкен Нарын нан зауытында автобус жүргізушісі болып төрт жыл жұмыс істедім. Бірақ оның үш жылы зейнетақыға кірмей қалған, - деді зейнеткер сот залында.
Кейін белгілі болғандай, Үлкен Нарын аудандық тұтыну қоғамдастығының мұрағат бөліміне қажетті құжаттардың жартысы ғана келіп түскен. Яғни, 1994-1996 жылғы құжаттар келмей қалған. Сондықтан сот зейнеткердің талабын толықтай қанағаттандырған.
