Өскеменде ер адам өзімен бірге тұрған әйелді тонап кетті

35 жастағы әйелдің айтуынша, үйінен бір қап ұн, мультипісіргіш, буқазан, миксер, "Samsung" маркалы планшет, үтік, 10 мың теңге және кір жуғыш ұнтаққа дейін жоғалып кеткен. Барлық шығын 300 мың теңгені құраған.

Құқыққорғау органдары қызметкерлері қаскүнемді ізін суытпай тұрып ұстаған. Ол зардап шегушімен бірге азаматтық некеде болған 36 жасар ер адам болып шыққан. Қала тұрғыны әрекетін мойындап, ұрланған дүниелерді қайтарып берген.

Өскемен қалалық ІІБ баспасөз қызметі хабарлағандай, оған қатысты ҚР ҚК 188 бабы бойынша қылмыстық іс қозғалған.