Өскемен мен ШҚО ШҚО әкімі Берел қорымындағы археологиялық қазбалармен танысып қайтты
Даниал Ахметов жақында ШҚМУ археологтары тапқан тарихи жәдігерлерді көріп қайтуға барды
Сәрсен Аманжолов атындағы ШҚМУ тарихи факультетінің студенттері мен археологиялық топтың жетекшісі Зайнолла Самашев Берел қорымынан Алтын әйел адамның тапқаны белгілі.
ШҚО әкімдігі баспасөз қызметі, қорымнан алтын әшекей қалдықтары, тон ішіктер, бас киім, белдеу, қанжардың табылғанын әрі ғалымдардың мұны әйел адам деп танып отырғанын хабарлайды. Құнды жәдігерлер Патшалар аңғарынан табылған.
- Бұл жердің құдіреті мен сұлулығы кез келген адамды тебірентеді, - дейді облыс басшысы Даниал Ахметов. - Патша қорғаны аталуы тегін емес. Бұл - нағыз көшпенділердің рухын танытатын мекен. Бұл – көшпенділерде мәдениет болмаған деген қасаң пікірді жоққа шығаратын нағыз тарихи шындық.
Айта кетейік, қыркүйек айында пр. Зайнолла Самашев Берел қорымындағы қазба жұмыстары жайында Өскемен қаласында өтетін халықаралық конференцияда баяндамақ.
