Мемлекет басшысы жедел штабтың кезекті отырысын өткізді

Президентке оның Алматыға қосымша күштерді, оның ішінде ҰҚШҰ күштерінің бітімгершілік контингентін жіберу жөніндегі шешімінің арқасында қала құтқарылып, террористерден шеттетілгені баяндалды, деп хабарлайды Устинка LIVE тілшісі.

Қазіргі уақытта қаланың тыныс-тіршілігінің барлық салалары белсенді қалпына келтірілуде, деп хабарлайды ҚР Президентінің баспасөз қызметі.

Алматының барлық жылумен жабдықтау, электрмен жабдықтау, сумен жабдықтау және газбен жабдықтау объектілері штаттық режимде жұмыс істейді. Сауда нысандары, қоғамдық тамақтану орындары, базарлар, ЖҚС және өнеркәсіптік кәсіпорындар жұмысын қалпына келтіруде, қоғамдық көлік іске қосылды, - деді Алматы қаласының әкімі Бақытжан Сағынтаев.

Қасым-Жомарт Тоқаевқа зардап шеккен әкімдік ғимаратында 14 қалалық басқарма орналасқандығы туралы мәлімет берілді, олар қазір резервтік ғимараттарға, сондай-ақ басқармалық бағынысты ұйымдарға көшірілді.

Тәртіпсіздік кезінде келтірілген залал мен шығынды бағалау бойынша жұмыс жүргізілуде.

Мемлекет басшысы өз сөзінде еліміздің ең ірі қаласына жасалған террорлық шабуыл зардаптарының ауқымын жеке бағалау үшін Алматыға келгенін атап өтті.

Президент Үкіметтік комиссияға Алматы әкімдігімен бірлесіп, инфрақұрылым нысандарын, оның ішінде мемлекеттік органдардың, құқық қорғау және арнайы құрылымдардың ғимараттарын, бейнебақылау жүйесін қысқа мерзімде қалпына келтіруді тапсырды. Сондай-ақ зардап шеккен кәсіпкерлерге қолдау көрсетіледі.

Өздеріңіз білесіздер, Алматы-менің туған қалам. Мен осында дүниеге келдім, оқыдым. Қазір біздің алдымызда осы қаланы қысқа мерзімде қалпына келтіру міндеті тұр. Бұл Президент ретінде және біздің мемлекетіміздің азаматы ретінде мен үшін абырой ісі деп айтуға болады. Мен қаланың қалпына келтірілетініне күмәнім жоқ, Үкіметтің алдында қаланы бұрынғыдан да жақсы көру міндеті тұр. Өте жақсы жұмыс істеу керек, – деді Қасым-Жомарт Тоқаев.

Мемлекет басшысы ҰҚШҰ Біріккен бітімгершілік контингентінің бөлімшелерін алдағы уақытта шығару туралы да айтты.

Ертең ҰҚШҰ бітімгершілік контингентінің ұйымдасқан түрде шығарылуы басталады. Мен тиісті мемлекеттердің басшыларымен келіссөздер жүргіздім. Мүмкіндікті пайдалана отырып, контингент қолбасшылығына осы бірнеше күн ішінде атқарған жұмысы үшін ризашылығымды білдіргім келеді. ҰҚШҰ бітімгершілік контингентінің Қазақстанда, оның ішінде Алматыда болуы біздің елдегі жағдайды тұрақтандыру тұрғысынан өте үлкен рөл атқарды. Әрине, бұл террористер мен бандиттердің агрессиясына тойтарыс беру үшін үлкен психологиялық маңызға ие болды. Миссия өте сәтті деп бағаланады. Әріптестерім-мемлекет басшыларына тағы да алғыс айтамын, - деді Президент.