Экология министрлігі Қазақстандағы ластанған қалалардың мәселесін шешуді ұсынды

Қазақстанда неғұрлым ластанған 10 қаланы газдандырып, баламалы энергия көздеріне көшіру қажет, деп санайды Экология министрлігінің Экологиялық реттеу және бақылау комитетінің төрағасы Зулфухар Жолдасов.

- Орта мерзімді перспективада неғұрлым ластанған 10 қаланы газдандырып, энергияның баламалы көздеріне көшіру қажет, - деді Жолдасов бейсенбі күні Нұр-Сұлтанда өткен баспасөз мәслихатында.

Оның айтуынша, "Қазгидромет" экологиялық мониторингінің нәтижелері 2020 жылдың қорытындысы бойынша 45 өнеркәсіптік қала мен 10 ірі қала атмосфералық ауаның ластану деңгейі жоғары аймаққа жататынын көрсетті.

- Бұл Нұр-сұлтан, Алматы, Қарағанды, Теміртау, Атырау, Ақтөбе, Балқаш, Өскемен, Жезқазған және Шымкент қалалары. Қалалардағы ауаның ластану себептерін үш санатқа бөлуге болады. Мәселен, Алматы және Нұр-сұлтан қалаларында ластанудың негізгі пайызы жылу көздеріне (қазандықтар), Автокөлікке және жеке секторға тиесілі. Өскемен мен Теміртауда эмиссиялардың ең көп көлемі өнеркәсіпке тиесілі. Жоғары ластанудың себебі Ақтөбе мен Атырауда ескірген кәріз-тазарту құрылыстары болып табылады, - деді Жолдасов.

Оның айтуынша, министрлік экологиялық мәселелерді және оларды аймақтардың жұртшылығымен, әсіресе экоактивистермен шешу жолдарын қарастырды. Талқылау нәтижелері бойынша 17 жол картасы әзірленді, онда 485 іс-шара көзделген. 2021 жылы 95 іс-шара өткізу жоспарланған. 2025 жылға қарай жол карталарын іске асыру 10 қалада атмосфераның ластану индексін жоғары деңгейден орташа деңгейге дейін төмендетуге мүмкіндік береді, бұл атмосфералық ауаның жай-күйін жақсартуға ықпал ететін болады.