Қазақстанда шетелдік әлеуметтік желілерді мемлекеттік тіркеуден өтуге міндеттеу жоспарлануда

Енді шетелдік әлеуметтік желілер мен мессенджерлердің иелері заңды тұлға ретінде мемлекеттік тіркеуден өтетін болады немесе Қазақстанда филиалдарын ашады. 

Тиісті норма сәрсенбіде Парламент Мәжілісі (төменгі палата) бірінші оқылымда мақұлдаған "Қазақстан Республикасының кейбір заңнамалық актілеріне баланың құқықтарын қорғау мәселелері бойынша өзгерістер мен толықтырулар енгізу туралы" заң жобасында қамтылған.

- Қазақстан Республикасының аумағында қызметті жүзеге асыру үшін шетелдік онлайн-платформаның немесе жедел хабар алмасу сервисінің меншік иелері және (немесе) өзге де заңды өкілдері заңды тұлғаларды мемлекеттік тіркеу және филиалдар мен өкілдіктерді есептік тіркеу туралы Қазақстан Республикасының заңнамасында белгіленген тәртіппен заңды тұлғаны міндетті мемлекеттік тіркеуді немесе шетелдік заңды тұлғалардың филиалын (өкілдігін) есептік тіркеуден өткізеді, - делінген Палатаның сайтында жарияланған заң жобасында.

Бұл ретте шетелдік онлайн-платформа немесе жедел хабар алмасу сервисі филиалдарының басшылары Қазақстан аумағында шетелдіктер не азаматтығы жоқ адамдар бола алмайды.

- Егер шетелдік онлайн-платформа немесе жедел хабар алмасу сервисі Қазақстан Республикасының заңды тұлғаларды мемлекеттік тіркеу және филиалдар мен өкілдіктерді есептік тіркеу туралы заңнамасында белгіленген тәртіппен заңды тұлғаны міндетті мемлекеттік тіркеу немесе шетелдік заңды тұлғаның филиалын (өкілдігін) есептік тіркеу рәсімін жүргізбесе, осы ресурстардың қызметі Қазақстан Республикасының аумағында шектеледі, - делінген құжатта.

Аталған заң жобасы қаралған палатаның жалпы отырысы барысында аталған нормалар жарияланбады және талқыланбады. 

Түзетулерді Қазақстан Парламентінің депутаттары әзірледі.