13 шілде Қазақстанда ұлттық аза тұту күні деп жарияланды

Қазақстан президенті Қасым-Жомарт Тоқаев өткен аптада телевизиялық үндеумен сөз сөйлеу барысында 13 шілде - ұлттық аза тұту күні деп жариялады.

Қазақстанда жалпы ұлттық аза тұту күні бүкіл ел бойынша бір минут үнсіздік жарияланатын болады, деп хабарлады Мемлекет басшысының кеңесшісі Ерлан Карин.

-13 шілде - жалпыұлттық аза тұту күні коронавирус пандемиясының құрбаны болған азаматтарды еске алу күні, Нұр-Сұлтан уақыты бойынша сағат 12.00-де бүкіл ел бойынша бір минут үнсіздік жарияланатын болады, - деп жазды Карин жексенбі күні әлеуметтік желілерде.

Қазақстанда 13 шілде жалпыұлттық аза тұту күні деп жарияланды. Бұл туралы Президент Қасым-Жомарт Тоқаев халыққа жолдаған үндеуінде айтты.

- Көптеген елде жағдай бізден де қиын. Дегенмен "Әр қазақ - менің жалғызым" дегендей, әр азаматымыздың қазасы жүрегіме қатты батады. Мынау алапат індет арамыздан аталай асылдарымызды жұлып әкетуде. Бүгінде қара жамылып отырған азаматтарымыздың қайғысына ортақтасып, көңіл айтамын, - деді Қазақстан Республикасының Президенті Қасым-Жомарт Тоқаев.

Заңнамаға сәйкес, ұлттық аза тұту күніне орай бұл күні Қазақстанның Мемлекеттік Туы, Республика Қарулы Күштері түрлерінің тулары биіктігінің жартысына төмен түсіріледі. Бұл күні теле -, радиоарналарда жарнамаға тыйым салынады. Отандық телевизиялық арналар мен радиостанциялар ойын-сауық бағдарламаларын таратуды тоқтатады, газеттер ойын-сауық сипатындағы ақпараттан бас тартады.