Қазақстан Таразда граффити арқылы есірткі жарнамалаушылармен қарқынды күрес жүріп жатыр
Жамбыл облысының полиция қызметкерлері граффити арқылы есірткіні жарнамалап жүргендерді іздеп жатыр
"Рефлекс-2019" операциясы аясында осындай заңға қайшы әрекетпен айналысып жүрген Тараз қаласының тұрғыны қолға түсті.
- Үй қоршаулары мен үйлердің сыртына сурет салып, сол арқылы есірткіні насихаттаған. Қолға түскен азамат қылмысын мойындады және сол үшін жауапқа тартылды. Анықталған граффити-жазулардың барлығы жойылды. Ал есірткіні жарнамалап жүрген сайттар бұғатталды, - деп мәлімдеді мекеме.
Есірткі қылмысымен күрес қызметінің мамандары Тараз қаласында барлығы 600 граффити анықтап, көзін жойды. Бұл граффитилерде есірткі сатушының телефон нөмірі мен арнайы құпия сөздері бейнеленген.
Осындай қылмыстық іске барғандар ҚР ӘҚК 423-бабы бойынша жауапқа тартылады. Ол бойынша 150-ден 700 АЕК-ге дейін айыппұл да көзделген. Яғни, 378 мыңнан 1 767 500 теңгеге дейін айыппұл салынады.