Қазақстан Солтүстік Қазақстанда зейнеткерді алдап кеткен алаяқ ұсталды
Солтүстік Қазақстан облысының тәртіп сақшылары 80 жастағы зейнеткердің ақшасын жалған купюроға ауыстырып кеткен алаяқты ұстады
Алаяқ Мәмлүт ауданында үй аралап, шәлі сатып жүрген екен.
- Қариямен сөйлесе келе, елде жаңадан қаржылық реформа болып жатқанын әрі ақшаларды басқа купюроға ауыстыру керек екендігін айтып, 140 мың теңгені сувенир купюроларға алмастырып кеткен, - дейді полицейлер.
Алайда кейін күмәнданған қария полицияға хабарласып, мән-жайды түсіндірген. Тәртіп сақшылары іздеу жұмыстарын бастап, қылмысқа күмәнді 64 жастағы ресейлік азаматты ұстаған.
- Алдап алып кеткен қаражат иесіне қайтарылды. Көрші елдің азаматына елден шықпау жөнінде қолхат алынды, - дейді тәртіп сақшылары.
