Қазақстан Астана дәрігерлерінің қанша еңбекақы алатындығы белгілі болды
Кей дәрігерлер 550 мың теңгеге дейін жалақы алады
Астана қаласы Қоғамдық денсаулық сақтау басқармасының басшысы Камалжан Надыров елордалық дәрігерлердің жаңа жалақы жүйесі туралы айтты, деп хабарлайды ҚазАқпарат ХАА.
- Жетекшілік құрамның жұмыс тиімділігін көтеру үшін биыл 50% жоғары жаңа жалақылар тағайындалды. Биылдан бастап, бас дәрігерлер өз ұйымының бейіні мен жүктемесіне қарай, ай сайын 350-550 мың теңге аралығында жалақы алады. Әр мейрам сайын берілетін сыйақылар да тоқтатылды. Оның орнына жартыжылдық қорытындысы бойынша жақсы нәтиже көрсеткен мамандарды қолдау бойынша жаңа бонустық жүйелер қарастырылған. Осылайша, тиімді жұмысқа жағдай жасап, емхана жетекшілерінен нақты нәтиже талап ете аламыз, - деді Камалжан Надыров Астанада өткен баспасөз мәслихатында.
Оның айтуынша, Астанадағы дәрігерлердің орташа жалақысы емханаларда - 150-160 мың теңге, ауруханаларда - 180-200 мың теңгені құрайды.