Қазақстандық әртістер Испанияны таңқалдырды
Испаниядағы танымал шаһарлардың бірі Валенсияда "Астана Опера" театры балет труппасының орындауындағы "Аққу көлі" балетіне билет түгел сатылған
Испан жұртшылығы астаналық театрдың өнер көрсетуі айналасында айрықша қызығушылықтарын танытып, бір дүрлікті, деп хабарлайды 24 телеарнасы.
Әртістердің бұл жерде өз өнерлерін алғаш рет ұсынуларына қарамастан, оларды көшелерде танып, "Астана Опера" деген атауды қуанышпен қабылдап жатты, себебі испандықтар қазақстандық театрдың онлайн-көрсетілімдері мен елордалық труппа туралы жиі жазатын әлемдік мәдениет жаңалықтарын қалт жібермейді.
Испанияға гримерлер, костюмерлер мен сахна машинистерін қоса 100 адамнан астам әртістер құрамы келді. Валенсияға труппа аты әлемге әйгілі опера әншісі Пласидо Домингоның шақыртуымен барды. П.Чайковскийдің балетіне арналған сән-салтанаты жарасқан декорациялар София Патшайымның өнер сарайы сахнасының (Валенсия) ажарын айшықтай түсті. Театр жаңа, ол 2005 жылы ашылды. 1400 орындық зал әлемдік балет классикасы жауһарын көруге асыққан көрермендерге әп-сәтте лық толды.