Қазақстан Астанада "Астана Хаб" технологиялық паркінің ашылуы өтті
"Астана Хаб" технологиялық паркінің ашылу салтанатына ҚР Президенті қатысты
Шара алдында Нұрсұлтан Назарбаев қазақстандық стартап-компаниялардың жобаларымен танысып, ғылыми-зерттеу зертханаларын қарап шықты. Сонымен қатар, IT-университет қызметі мен "Цифрлы Қазақстан" мемлекеттік бағдарламасының жүзеге асу жайы турасындағы баяндаманы тыңдады, деп мәлімдейді Ақорданың сайты.
Ашылу салтанатында Елбасы сөз сөйледі.
- Жас әрі қонақжай Астанада сіздерді көргенімен қуаныштымын. Ресми ашылу салтанатына келген барлық шетелдік қонақтарға алғыс айтамын. Төртінші өндірістік революция кезеңінде бұл шараның Қазақстан үшін маңызы зор, - деді Нұрсұлтан Назарбаев.
Елбасы елдің болашағы үшін цифрландырудың маңызы зор екенін баса айтты.
- Қазақстан ТМД елдері арасында алғашқы болып электронды мемлекеттік қызметтерді көрсетуді енгізе бастады. Өткен жылы Қазақстанның үшінші жаңғыруын бастадық. Әлден нақты жетістіктер бар, - деп атап өтті Елбасы.
Нұрсұлтан Назарбаевтың айтуынша, "Астана Хаб" IТ-стартаптар Халықаралық технопаркі Қазақстанда жасалған инновациялық экожүйенің ядросына айналуы тиіс.
