Қазақстан Ақтауда белгісіз кәсіпкер көпбалалы отбасыларға пәтер сыйлауда
Белгісіз атпен қалғысы келген ақтаулық кәсіпкер қиын жағдайға тап болған екі отбасына пәтер сыйлаған
Өз атын айтқысы келмейтін кәсіпкер мұқтаж адамдарға көмектесіп, қайырымдылықпен айналысып жүр, деп хабарлайды Sputnik Kazakhstan.
Кәсіпкер қайырымдылық мақсатында екі баласы мүгедек көбалалы анаға ауылдан екі бөлмелі пәтер берген. Балаларын тәрбиелеп отырған жалғызбасты әйелге үйді жалдау қиынға соққан. Жалға беруші үй иелері де ерекше балалардың жағдайын ескеріп, түсіністік танытпаған. Белгісіз жанның қайырымдылығының арқасында енді отбасының өз баспанасы бар.
Екінші отбасында да төрт бала бар. Ерлі-зайыптылардың өздері жетім болғандықтан, қолдаусыз қалған және үй сатып алмақ түгілі жалдауға мүмкіндіктері болмаған.
- Ерлі-зайыптылар қораларды мекен етіп келген, далада жұмыс істеп, мал баққан. Оларда жарық пен жылу да болмады, - дейді аймақ тық коммуникациялар қызметінің басшысы Айсұлу Дүтбаева.
Кәсіпкер оларға облыс орталығындағы жаңадан салынған бір бөлмелі пәтердің кілтін табыс етті. Сондай-ақ, ерлі-зайыптылардың құжаттарын рәсімдеуге көмектесуге уәде еткен көрінеді.