Қазақстан Мемлекет басшысы қазақстандықтарды Құрбан айт мерекесімен құттықтады
ҚР Президенті Нұрсұлтан Назарбаев отандастарын Құрбан айт мерекесімен шын жүректен құттықтады
Мемлекет басшысының құттықтауы Ақорданың ресми сайтында жарияланады.
- Бұл күндері адамдар жақындарына ақ тілектерін арнап, игі істер жасауға ұмтылады. Құрбан айт алуан түрлі конфессиялар мен этнос өкілдері тұратын Қазақстанда азаматтардың бойына ізгілік нәрін сеуіп, олардың ұстанатын діні мен ұлтына қарамастан, бір-бірін қадірлей білуге зор ықпал етеді. Сондай-ақ, рухани тұтастығымызды нығайтып, бірлігімізді бекіте түседі, - делінген құттықтауда.
Қазақстан Республикасының Президенті Н.Ә. Назарбаевтың айтуынша, Құрбан айт - исламды жақсылықтың, жасампаздық пен үйлесімділіктің діні екенін паш етіп, күллі мұсылман қауымын бейбітшілік пен татулыққа, өзара түсіністікке шақыратын қасиетті мейрам.
Көпұлтты Қазақстан үшін Құрбан айт діни бірлікті және халықты өзара құрметтеуді нығайтуға ықпал ететін маңызды мереке болып табылады.