Қазақстан Денис Тенмен қоштасу 21 шілде күні өтеді
Қазақ елінің мақтанышына айналған спортшымен қоштасу рәсімін ұйымдастыруды Алматы қаласының әкімдігі мен ҚР Мәдениет және спорт министрлігі қолға алды
Денис Теннің азаматтық жаназасы 21 шілде күні Алматыдағы Балуан Шолақ атындағы спорт сарайында өтеді, деп хабарлайды "Қазақпарат" ХАА сайты.
- Министр Арыстанбек Мұхамедиұлы мен Алматы қаласының билігі Денистің ата-анасына барып, көңіл айтпақ. Ал жерлеу рәсімін ұйымдастыруды министрлік пен әкімшілік өз қолдарына алмақ, - деп мәлімдеді мекеменің баспасөз қызметі.
Танымал қазақстандық мәнерлеп сырғанаушы Денис Теннің қазасы тек Қазақстан халқының емес, әлем халқының да қабырғасын қақыратып кетті. Денистің ата-анасы мен жақындарына ҚР Президенті Нұрсұлтан Назарбаев, Қазақстанның спорт қоғамының өкілдері, Қазақстан мен Ресейдің шенеуніктері мен дипломаттары қайғыра көңіл айтты.