"Азаматтарға арналған үкімет" МК азаматтарды делдалдардың қызметіне жүгінбеуге шақырып отыр

Халыққа қызмет көрсету орталықтары маңында құжаттарды тез жасап беруге ақы сұрап жүрген адамдар тобы пайда бола бастаған, деп хабарлайды "Қазинформ".

Ал "Азаматтарға арналған үкімет" мемлекеттік корпорациясы Халыққа қызмет көрсету орталығында делдалдардың болмайтындығын, ал құжатты шапшаң жасап беруге ақы сұрайтын адамдар алаяқтар екендігін айтады.

- Халыққа қызмет көрсету орталықтары мұндай алаяқтарға тосқауыл қоя алмайды, тек құқық қорғау органдарына хабарлайды. Жылдың басынан бері 5 айдың ішінде Халыққа қызмет көрсету орталығы маңында осындай заңбұзушылықтармен айналысқандарды ұстау үшін 161 тексеріс өткізілді, - дейді мемлекеттік корпорацияның баспасөз хатшысы.