Қазақстан Германияда ұсталған қазақстандық кәсіпкер елге қайтарылды
23 сәуірде Германияда Qazaq Banki акционері Бақыт Ибрагим ұсталды
Бас прокуратура қызметкерлері Сыбайлас жемқорлыққа қарсы қызметпен бірлесе отырып, "Лидер Нефтепродукт KZ" ЖШС-ның директоры Бақыт Ибрагимді қылмыстық жауаптылыққа тарту үшін Германиядан экстрадициялады, деп хабарлайды Tengrinews.kz.
- Бас прокуратураның мәліметтері бойынша, ол алдын ала сөз байласқан адамдар тобымен "Bank RBK" АҚ-нан аса ірі көлемде ақшалай қаражатты алаяқтық жолмен жымқырған деген күдік бар. 2013-2016 жылдар аралығындағы мерзімде жымқырылған қаражаттың жалпы көлемі 50 миллиард теңгені және 83 миллион АҚШ долларын құрайды. Қылмысты жасағаннан кейін, күдікті қылмыстық қудалау органдарынан жасырынып қалған, осыған байланысты оған халықаралық іздеу жарияланды. Қазіргі уақытта Ибрагим Астана қаласының тергеу изоляторында, - делінген хабарламада.
