Бас мүфти қазақстандықтарды қасиетті Рамазан айының басталуымен құттықтады

Қазақстан мұсылмандары діни басқармасының ресми сайтында Бас мүфтидің құттықтауы жарияланған.

- Рамазан – рақым айы! Қасиетті айдың құрметі үшін бір-бірін кешіріп, мейірімділік жолын ұстанған пенделер сауапқа кенеледі. Өзгеге мейірім көрсеткен адамды Алла Тағала Өз мейіріміне бөлейді. Кешіргенге – кешірім жасалады. Рамазан – жақсылық айы. Оразада жасалған әрбір жақсы амалдың сауабы еселеніп жазылады. Хадис-шарифте айтылғандай, "адам баласының барлық игі істерінің сауабы артады. Әрбір жақсылыққа он еседен жеті жүз есеге дейін сауап жазылады, - деп атап өтті  Серікбай қажы Ораз."

Бас мүфти отандастарымызды материалдық көмекке мұқтаж жандарға көңіл бөліп, қайырымдылық іс-шараларға белсенді түрде атсалысуға шақырды. Кәсіпкерлерді рамазанның құрметі үшін азық-түлік, көкөніс пен тұрмыстық заттарға, жол-көлік ақысына жеңілдіктер жасауға үндеді.

Айта кетейік, Қазақстан мұсылмандары діни басқармасы "2018 – Ислам және отбасы жылы" деп атады. 

- Он екі айдың сұлтаны – рамазан құтты, берекелі болсын! - деп тілегін білдірді елдің Бас мүфтиі. - Қасиетті айда жасайтын құлшылық, дұға-тілектеріңіз қабыл болсын! Алға қойған арман-мақсаттарыңыз орындалып, оразадан оразаға аман-есен жете беруімізді Алла нәсіп етсін! Еліміз аман, жұртымыз тыныш, халқымыздың бірлігі нығайып, берекесі арта бергей! Тәуелсіздігіміз әрқашан баянды болғай! Әумин!