Қазақстан "Көз жұмған" алматылық зейнеткер құжаттарын ала алмай жүр
Зейнеткер өзінің "өлі" екендігін Халыққа қызмет көрсету орталығына келіп жүргізуші куәлігін ауыстырмақ болған кезде білген
66 жастағы Айтбай Абдуллаев бір жарым ай бойы әртүрлі мекемелерге барып, өзінің "тірі" екендігін дәлелдей алмай жүр, деп хабарлайды 31 телеарна тілшілері. Зейнеткер құжат бойынша 2013 жылы мамыр айында "өлді" деп саналған.
- Дәрігерге қаралуға барған кезімде "Аға, Сіз бірнеше жыл бұрын қайтыс болған екенсіз ғой" дегенде не дерімді білмей қалдым. Қашан? Мен, міне, отырмын ғой. Үш күн бойы үйде жүрдім есеңгіреп. Өзіңнің өліміңді білген қиын екен, - дейді зейнеткер.
Оның үстіне, мемлекеттік мекемелер "өлі" адамнан салық пен айыппұл, пәтер төлемақыларын алып отырған.
Енді зейнеткер өзін "тірі" екендігін дәлелдеу үшін бірнеше мекеменің табалдырығын тоздыратын болды.
