Қазақстан Қазақстандық актер «Оскар» алды
Санжар Мадиев спортты кинода насихаттағаны үшін жоғары марапатқа ие болды
Осыған дейін кинода 17 рөлді сомдаған 31 жастағы Санжар Мадиев спорттық «Оскар» марапатына ие болды, деп хабарлайды КТК телеарнасы. Марапаттау салтанаты Атлантик Сити қаласындағы Tropicana Casino & Resort қонақ үйінде өтті. Оны Халықаралық Жауынгерлік Өнер Акадамиясы ұйымдастырған.
Оскар сыйлығы Санжар Мадиевке «Қорғаушылар» («Защитники») фильмінде Ханның рөлін сомдағаны үшін берілген. Фильмді түсіру барысында қазақстандық актер өзін шебер спортшы ретінде көрсете білген. Санжар бала кезден спортпен айналысқан: баскетбол, теннис, қоян қолтық ұрыс, суда жүзу.
- Бұл - Нью-Джерсиге, Атлантик-Ситиге бірінші рет баруым. Әрі жаңа жылдан кейінгі алғашқы жұмыс сапарым. Ал мұнда мен кино саласында спортты насихаттағаным үшін спорттық «Оскар» сыйлығын алып отырмын, - деп жазды актер өзінің Instagram желісіне.
