Салынып жатқан мектеп түсін қанық қылу керек

Бұл нысандардың арасында екі мектеп құрылысы бар. Оның бірі Ұшақтар мөлтек ауданындағы үш қабатты 1200 орындық мектеп ғимараты болса, екіншісі Бобровка кентіндегі 600 балаға арналған үш қабатты мектеп ғимараты. Облыс әкімінің сөзіне қарағанда аталмыш екі мектеп Семей қаласындағы мектеп жетіспеушілігін толықтай жояды. - Бұл екі мектеп Семей қаласындағы мектеп мұқтаждығын толықтай жояды. Ұшақтар шағын ауданындағы мектеп 2018 жылы маусым айында аяқталады. Сонымен бірге Степное кентінде 50 орындық тағы бір мектеп салынатын болады. Бұл үш мектеп, - деді облыс басшысы. Ғимараттың түр-түсіне көп мән беретін әкім мектеп ғимаратының түсіне қатысты да өз пікірін айтып үлгерді. Әкімнің ойынша, ғимараттың қызыл түсі, яғни, қызыл кірпіші сапасыз, сондықтан оны қайта қанық қылып бояу керек. Өйткені ғимараттар ұзақ жыл сақталып, қалаға көрік беру керек.