Қазақстан Ресейдің жаңа премьер-министрі Қазақстанға келеді
Ресей премьер-министрі Михаил Мишустин ЕАЭО-дағы әріптестерімен өзекті мәселелерді талқылайды, сондай-ақ цифрлық болашақ және жаңа технологиялар форумына қатысады
Ресей Федерациясы үкіметінің төрағасы Михаил Мишустин 31 қаңтарда Алматыда өтетін Еуразиялық үкіметаралық кеңестің отырысына қатысады.
- Кездесудің күн тәртібіне Еуразиялық экономикалық одақтың (ЕАЭО) жұмыс істеуі, оның нормативтік-құқықтық базасын одан әрі жетілдірудің өзекті мәселелері кіреді, - делінген Ресей үкіметінің баспасөз қызметі таратқан хабарламада.
Ресей Федерациясы министрлер кабинеті баспасөз қызметінің хабарлауынша, халықаралық тәжірибені және көпжақты интеграциялық бірлестіктердің тәжірибесін ескере отырып, ЕАЭО-да ұлттық валюталарды қолдануды кеңейту және қорғау шараларын жетілдіру бойынша бірқатар бастаманы талқылау жоспарланған.
- ЕАЭО ішкі нарығындағы кедергілерді жоюға, ұлттық ақпараттық жүйелерді біріктіруге, кедендік реттеу саласында өзара әрекеттесуге және жалпы одақтық нарықты қалыптастыруға басымдық беріледі, - делінген хабарламада.
Михаил Мишустин сонымен қатар "Ғаламдық экономиканың цифрлық болашағы" форумына қатысады.
Айта кетейік, Михаил Мишустин таяуда Дмитрий Медведевтің орнына Ресей Федерациясының премьер-министрі болып тағайындалды.
