Қазақстан Нұрсұлтан Назарбаев мереке қарсаңында елордадағы шіркеуге барды
Нұрсұлтан Назарбаев Астанадағы қасиетті Успен кафедралдық соборына барды, деп хабарлайды Ақорданың ресми сайты
Мемлекет басшысы барша православ христиандарын Рождество мерекесімен құттықтады.
- Бүгін бүкіл Қазақстан, барлық конфессиялар мен этностардың өкілдері осы мейрамды атап өтіп жатыр. Бұл мереке мейірімділік пен бақ-берекенің символы саналады. Осы күні ескі өкпе-реніштер ұмытылып, мұқтаж жандарға көмек көрсетіліп, дұға оқылады, - деді Қазақстан Республикасының Президенті.
Елбасы тәуелсіздіктің алғашқы жылдарынан бастап мемлекетіміздің этносаралық және конфессияаралық келісімді нығайту жөніндегі жұмыстарды жүргізіп жатқанына тоқталды.
- Біз бірлігіміздің арқасында экономикада және халқымыздың әл-ауқатын арттыру ісінде зор жетістікке жеттік. Мен егемендік жылдар ішінде православ христиандарының қолдауын сезіндім, сол үшін сіздерге ризашылық білдіремін, - деді мемлекет басшысы.
Сондай-ақ, Нұрсұлтан Назарбаев еліміздің жер бетіндегі бейбітшілік пен тыныштықты сақтауға бағытталған жаһандық дінаралық диалогты дамыту ісіндегі рөлін атап өтті.