Қазақстанда тегін дәрілерді алу туралы SMS-хабарлама жіберіледі

SMS-хабарламаларды тегін дәрі-дәрмек алатындар тізіміне енген адамдарға жібереді, деп хабарлайды Zakon.kz.

Енді пациенттерге 2018 жылдың соңына дейін SMS-хабарлама жіберу көзделіп отыр. Хабарлама биылғы қараша-желтоқсан айларында тегін дәрі-дәрмек алғандар тізіміне енген пациенттерге жіберіледі. 

- 2018 жылдың басында Медициналық сақтандыру қоры кепілдендірілген тегін көмек пакеті шеңберінде берілетін дәрі-дәрмек пен медицина бұйымдарына ақы төлеу тәртібін өзгертті. Яғни, бұрын дәрі-дәрмек пен медициналық мақсаттағы бұйымдар ақысы дәрігер жазған рецепт бойынша төленіп келген болса, биылдан бастап дәрі қолма-қол берілген рецептілерге ғана төленеді. Атап айтқанда, пациент дәріні алған кезде тиісті құжаттарға қол қояды. Содан кейін төлем туралы мәлімет "Дәрі-дәрмекпен қамтамасыз ету" ақпараттық жүйесіне енгізіледі. Ендігі кезеңде бақылау жүйесіне пациенттердің өздерін тарту көзделген. Бүгін біз осы жүйені нобайлы жоба ретінде іске қосып отырмыз, - деді Ботагөз Жақселекова.

Жоспар бойынша хабарлама рецептілерде көрсетілген 3 млн нөмірге түсуі тиіс. Хабарламада дәрі-дәрмектің берілген күні мен атауы көрсетіледі. Егер пациент препараттарды алмаған болса, SMS-хабарламаға жауап ретінде "0" цифрын жолдайды немесе "СК-Фармация" ЖШС-ның 1439 байланыс нөміріне қоңырау шалуға болады.