Маңғыстау ауруханасында әйелдер баласымен бірге еденде жатып ұйықтап жүр

Маңғыстауда төрт айлық сәбиімен бірге ауруханаға барған келініне жататын орын бермей қойғанына ашуланған қала тұрғыны Балзия Теңелбаева әлеуметтік желіде аурухана жағдайын жазып масақаралды, деп хабарлайды КТК тілшілері.

- Менің келініме жатар орын бермек түгілі матрас та бермеген. Отыратын орындық қана беріп қойған. Түнімен ауруханаға телефон шалып, баласы ауырып қиналып келген келіншекке бел жазатын орын тауып беріп өтіндім. Алайда дәрігерлер келініңіз шипажайға келген жоқ, үстелде отырсын деп ақыл айтты, - деп жазады.

Аурухана басшысы жатар орынның жоқтығына өздері де қынжылатындықтарын айтқан. Балаларға арналған инфекция бөлімінде 60 орын бар. Оған 77 пациент келіп отыр. Оның үстіне, балалармен қоса олардың ата-аналары бар. Әкімшілік ауруханаға әлі кем дегенде 35 жатар орынның қажет екендігін айтады.

Ал облыстық денсаулық сақтау басқармасы аурухананы кеңейтуге инвестор іздеп жатқанын жеткізді.